#鮑撈到 #撈起 #撈喜 #原隻鮑魚 #三文魚撈起 #做人要識撈 #美心中菜
我咁大個人第一次食撈起，梗係要拍低呢個值得紀念嘅破處時刻?
今次去咗旺角朗豪坊嘅八月軒食呢個鮑撈到‧盤滿砵滿孖寶，
個撈起上枱已經好大堆頭：一大碟排靚靚嘅撈起、一碟六隻原隻鮑魚、一碟三文魚刺身、一碟薄脆、兩兜醬汁、青檸、仲有三個利是封。
撈起總共有10個步驟，個個步驟都有唔同意頭，好似大吉大利、遍地黃金咁樣???
跟住佢張「教學」同啲朋友一齊逐步撈好好玩，
一齊隊對筷子埋去撈起佢真係好興奮！！！
個「原隻鮑魚三文魚撈起」基本有好多唔同嘅蔬菜，
仲有海蜇、三文魚刺身同原隻鮑魚等等。
老實講撈亂晒除咗最易認嘅海蜇、三文魚同鮑魚之外，
其他嘢真係要逐條撩嚟食先知入面有乜嘢，因為真係太多材料喇！
撈晒全部嘢之後，食落其實好似一個貴價、材料又豐富嘅沙律，
爽口嘅、脆嘅、腍嘅、彈牙嘅、煙韌嘅…諗到嘅口感入面都有，
撈埋晒啲醬汁之後，味道酸酸甜甜咁好開胃。
個撈起全部嘢食落都好新鮮? 不過食開肥嘢嘅我就覺得三文魚唔夠油潤！
個兜好大，材料都好多，不過因為係冷盤，所以硬係覺得唔夠暖肚。
當一份豐富嘅前菜同朋友一齊玩係幾開心嘅?
另外孖寶仲有個「油泡螺片一品盆」，
入面有原隻鮑魚、螺片、海參、瑤柱、鴨腳、冬菇、菜…
最欣賞係啲海參，又腍又彈又入味，
隻鴨腳都唔錯，腍得嚟又唔爛?
不過我地果盆啲螺片就韌咗啲囉！希望餐廳可以留意下啦！
呢個鮑撈到‧盤滿砵滿孖寶原價HK$888，中銀信用卡優惠價就HK$750。
（兩個價錢都唔包加一、茶位、前菜）
（怡翠軒、海逸軒、八月花、八月居呢幾間價錢會有唔同）
餐牌就話係4-6位用，如果係4-6個大人仲要有男人嘅話，應該係唔夠飽嘅，
尤其是入面無飯又無麵，啲男人就投訴㗎啦嘛！
佢地投訴嘅話返屋企就要煮麵畀佢食㗎啦嘛！
你話啲男人係唔係煩吖？！
「鮑魚三文魚撈起宴」、「鮑撈到‧盤滿砵滿」菜式組合於2月5日至3月18日，於全綫美心皇宮（中環大會堂分店除外）、全綫翠園 (機場美心‧翠園除外)、翠韻軒、八月軒、全綫八月、怡翠軒、海逸軒、八月花、八月居供應。
（由美心中菜贊助）
